الجواز وسنينه

وسنينه .

زمان كانت كل واحدة من البنات نفسها تتجوز الفارس اللي جي على حصان أبيض أو اسود أو أحمر أو حتى لو جي على ماكينة صيني أهو جي راكب حاجة وخلاص . الفارس الحلو الامور اللي مفيش منه اتنين فاضل يعلقله شبشب عيل صغير في رقبته علشان مايتحسدش  .   العريس العجبه

 

مع مرور الزمن والتطور واختلاف شكل الناس والشغل والزحمة والتوكتوك كل ده بدأ عدد العرسان في الإنقراض حتى وصل إلى 90 3roosa / 3rees 

ناخد امثلة

واحد وحيد ابوه وأمه جاي من بلاد بره مرييش يعني . زمان المنظر بتاع اللي جي من بلاد بره جاي في بييجوا 7 راكب لونها اخضر   كرنبي كده ومليانة كراتين على الشبكة بتعتها من مكونات تلك الكراتين كاسيت بروحين من اللي بيقلب الشريط لوحده . مروحة ستاند 4 ريشة . عدد 15 بطانية 2 وش ومع تطور الزمن ساعات بيبقى فيه كرتونة فيها فرن كهربة . والعريس نفسه  بنطلون جيينز وجاكيت جلد اسود  نضارة شمس وساعة معدن المينا بتعتها لونها اسود .

نرجع تاني . الولد معندوش اخوات يا ناس مامته مربية  باديها وسنانها وجه اليوم العظيم وقالها يا حاجة أنا عوز أتجوز . ده يوم المنى يا حبيبي لولولولييي تبدأ رحلة البحث عن العروسة المنتظرة . لأ  دي طويلة لأ دي هبلة لأ دي  لدغة  لأ دي مش عارفة مالها . حتى تعثر  الأم على مراد في فتاه رقيقة  مرهفة الحس  من الاخر هبلة تسمع الكلام ومتقولش بم .  يا عيني يا تنت أم العريس  تربي وتيجي غيرك تاخد . تعدي تطبخي سنة وتحطيه في الفرن  وتيجي العروسة تاخده مستوي
المهم طنط أم العريس هتبعت صورة العروسة  لابنها والعريس  حيبعت  صورته  العروسة . وهنبدأ  رحلة الاغاني الرومانسية . العريس يعد يحلم بفتنة  القلب ومنى الفؤاد  ويسمع  مصطفى كامل ومحمد فؤاد  أما بالنسبة للبنوتة  اللي مرهفة الحس  لا نستطيع ان نقول غير انها  شالت صورة مهند من على الدولاب  وحطت  صورة الباشمهندس  مع  موسيقى تصويرية  لتامر حسني

وطبعا مفيش مانع من بعد المكالمات الهاتفية  الدولية  وربنا يخليلنا  الإنترنت والسكيب ولو مفيش نت والنور مقطوع  نتصل في التليفون من الدقيقة أم الشيء الفلاني . وكله بيتظبط في التليفون  الهني مون فين  الفرح فين  لون شربات  العروسة . والتورتة  تسع ادوار مربعين  لأ  مدورين يا حبيبي  علشان الدائرة ملهاش حدود  زي حبي ليك  ( هاعيط من الرومانسية ( . يا حبيبتي عوزين نتجوز بسرعة علشان  نعمل ورق الاقامة  . يا حبيبتي  حياتي هيبقى ليها طعم وريحة ولون ( الله يقرفك  )

المهم العريس جي يا ماما العريس جي يا ماما حاجز الطيارة يا ماما . ماشي قومي استحمي  يا منيلة  بدل مايتصدم  وننزل نجيب بقى   كوباية شاي جديدة وتقم جاتاو مدهب وسكاكين ومعلق شوك . ويا عيني بابا العروسة  هيموت من المصاريف . يا راجل عوزين نبيض الرطوبة  في الصالون ولا الحمام المشترك  .
. العريس دخَل في الصالون أهو وقلبه  يرقص من السعادة . وتدخل عليه العروسة شايلة الشاي والجاتاو والعصير والكنافة والبيتزا والسندويشات وكوباية مية .

المهم القاعدة زي الفل وكله  عنب . ولكن  أنا مش مستريحله قوي يا ماما  د ا لابس  جزمة مش حلوة يا ماما , ده لابس ساعة مش حلوة  يا ماما . كنتي  فاكرة جايلك  رشدي اباظة   ماإنتي شفتي صورته ومكلفة يا عيني  مكالمة لو كان حوش تمنهم  كان  زمانه  اتجوز  شاكيرا .

وتعد تقارن بينه وبين  خطيب  بنت عم  أخو صاحبتها  أو جوز بنت خالة محمد  ومحدش يقولي محمد مين علشان أكيد في حد اسمه محمد  وليه بنت خالة ومتجوزة .

وبعد شهر وخلاص هييجي يتفق على خطوبة . أنا مش عوزة يا ماما مش مستريحله يا ماما . ولنا هنا واقفة

أم العروسة عوزة تخلص من اللي عندها في البيت دي وفي نفس الوقت  مش هتجيب واحدة تانية تنضف بفلوس هو مرتب الراجل  كام جنيه أصلا . فـبتضغط على بنتها حسب  حاجتها للشغالة في البيت وحسب سن البنت وحسب الفلوس اللي مع العريس وحسب الهدية اللي كان جايبها في أول زيارة .

أم العريس بقى فرحانة طبعا العدو اللدود مشي بس لازم قبل ماتمشي  تدي للعروسة من المنقي خياار . دا عريس تتمناه ست ستك  ياللي بيتكم ماكانش فيه شوكة  . ده جابلك المليح والغالي كله . ده استخسر فيَّ خمس أسوار دهب بندقي وجابلك محمول  مش عارفة زرايرو فين . وتكككككك  السكة اترزعت في وشها . على فكرة أم العريس مش زعلانة دي خرجت ك القائد المنتصر من المعركة . وعلى فكرة العريس مش مضايق أهو اكل اكلة كويسة في البيت عندهم  وأصلا الدقايق كانت دقايق مجانية