هذه البلد لم تعد بلدي

أنا عندي 28 سنة  طول عمري عايشة في مصر سافرت كتير ورحت وجيت وألف ألف وأرجع لبيتنا . أرجع لبلكونة بيتنا القديم . بابا كان على طول مسافر عايشة على طول أنا وأمي . عندنا جيران مسحيين على مسلمين . بس كلهم صحابنا بيسألوا علينا وبنسأل عليهم . ماما كانت دكتورة لو حد تعب يندهلاها ولا بتفكر الدواء هاتجبهلهم بكام ولا مين اللي هايخدو . المهم ان المريض ده يخف

أول يوم رمضان العائلة كلها متجمعة . جدو وبابا وماما وعمي وعمتي وولاد عمي وولاد عمتي . بكار  وباور رانجرز . عمو فؤاد وألف ليلة وليلة .

يوم العيد ونصحى من بدري علشان بابا يديني العيدية وماما تأكلني كحك من اللي هي عمله أصلها كانت بتقول دي كحكة بتعة نورا مفيش غير واحدة بس علشان بنتي وحدة بس . ونروح ونخرج ونزور بعضينا . يوم راس السنة . هوم الون ومعاها بيتزا . عيد ميلادي والتورتة بتعة ماما وكلنا متجمعين .

بس هو كل ده كان فين وراح فين . ناس ماتت وناس عايشة . ناس راحت وناس جت بس مش احنا لسة في نفس البلد . بس مش هي دي نفس البلد . البلد اللي كله بقى بيفتن في بعضه ده مسيحي سيبيه وده اخواني متشدد مالناش دعوة بيه . أنا هخلص فطار رمضان وهانزل على القهوة . طب ما احنا قاعدين مع بعض لا يا عم مااعدت الأهالي دي بتقلب نكد. تعالى يشربلك حجرين ولا اسهرلك في خيمة . وتلاقي التاني يلا على التراويح ودرس المسجد . طب واهلك ياإبني دول عوزينك معاهم ده رمضان الناس بتجمع ... تسيب الصلاة علشان اهلك هقولك إيه ماإنت متعرفش حاجة عن الدين .

يعني دلوقتي كلنا منعرفش حاجة عن الدين يا إما متشددين يا إما علمانيين .

ماأنا بصلي وبصوم وبوفي حق أهلي . وبوفي حق ربي وبخروج وبروح وباجي . هل أنا كده مش مسلمة .

العيب في مين . فينا ولا في اللي جي علينا من بره . فينا ولا في أهلنا . فينا ولا في رأسانا . العيب في مين

البلد دي بلدنا نفس الناس بس ماحدش بيضحك . محدش بيخاف على حد . كله بيفكر في نفسه . يا ناس مفيش حاجة هتتغير غير لما نغير نفسنا . للاسف هذه البلد لم تعد بلدي . أنا عوزة بلدي القديمة كله بيضحك كله مبسوط كله خايف على بعده كله خايف على بلده . البيبان كلها مفتوحة . كل البيوت بيتي كل الناس أهلي  . مش حاسة اني لوحدي . لقمة هنية تكفي مية . وكل سنة وانتوا طيبين