جواب لأمي

وبشر الصابرين الذين إذا اصابتهم مصيبة قالوا إن لله وإن اليه راجعون .

الله يرحمك يا أمي كان نفسي أكتب الكلام ده من زمان بس ماكنتش أدرى وماكنتش أدرى  اصدق انك مش موجودة بس بدأت اصدق دلوقتي ممكن علشان بقالك كتير مش بتكلميني أو مش بشوفك كنت فاكرة انك تعبانة وجاية  أو مسافرة وجاية  مع انك عمرك ماسفرتي منغيري .

بس لازم أكتب على الاقل لما حد يقرأ اللي كاتباه يعرف اد إيه إنتي كنتي عظيمة  وكنتي حنينة  ويقرالك الفاتحة

نبتدي بإيه يا نونو نبتدي بإيه يا نونو

ماشي ماما دكتورة ابية بركات اللي كانت عايشة أحلى قصة حب مع أبويا . من كلام بابا وارايبي ان ماما كانت شقية قوي . مكنتش بتحب اللعب بتعة البنات والعروسة والدباديب . ماما كانت بتحب تلعب كورة وتستخبى ورا سور الجنينة في اسكندرية وأول ماحد يكون معادي تفتح عليه خرطوم المية  . 

ماما اتخرجت من كلية الصيدلة  في 1973 وأنا طلعلها جبانة جدا . داخلة  الكلية دي وهي بتخاف تشوف دم أو تمسك  الفار . وجالها التكليف ساعة الحرب في بركة السابع في مستشفى الجيش هناك . خلصت  هناك وطلعت على مستشفى هرمن تدرس للطلبة الجدد والتمريض وامتياز طب  عقاقير وفارمكلوجي  أمي كانت شاطرة  واللهِ ونبيها ربنا يجازيها خير على العلم اللي اديته للناس

وبعد كده ربنا كرمها  ومسكت مديرة منطقة جنوب القاهرة الطبية  وهي لسة مكملتش 40 سنة . كانت بتحب شغلها وبتحبني .

لما أنا اتولدت وخلاص دخلا المدرسة أمي سبت كل  شغلها وقررت تعد جنبي علشان تخلينا بنت تشرف أهلها

طول عمري كنت شاطرة وكنت مرتبطة بماما قوي  . بابا كان على طول مسافر وحياتي كلها كانت أنا وهي وبس . مفيش قريب ولا اخوات أنا وأمي وبس . بنفكر زي بعض بنتكلم زي بعض بنلبس بنسافر كله كله مع بعض

لما نجحت في الثانوية االعامة ماما اعدت تعاية . طب ليه النكد يا حاجة قالتلي علشان يتقال نورا بنت ابية  جبت مجموع يشرف

قررنا أنا وأصحابي نسافر تركيا أنا وأمي عمرنا ماسبنا بعد أبدا ووان في الطيارة لقيت ماما قاعدة وراية . وحاجزه  في نفس الفندق

وكانت خيفة عليَّ أنا وأصحابي بطريقة غريبة هي دي ماما بتحب الناس وبتخاف عليَّ وعلى أصحابي أكتر من نفسها

دخلت الكلية واتخرجت واشتغلت والحمدلله  الترقية كانت بسرعة وعملت دراسة وخلصت دبلومة وخليتها فخورة بيَّ على اد مااقدر

وللاسف حصل اللي ماكانش نفسي يحصل بس الحمدلله ماما تعبت بين يوم وليلة تعبت كنا بنحتفل بعيد ميلادها أنا وبابا وكان تاني يوم بابا مسافر . وفجأة ماما أغم عليها ونزيف من كل جسمها وفي المستشفى الكبد تعبان . وقعدنا 3 سنين مابين مستشفيات وسفر وكل حاجة وتتحسن وتتعب وكل كلمها أنا مخلفة بنت بميت راجل , خلي بالك من باباكي وطول عمرك تخلي الناس فخورة بيكي وتدعي لأمك انها ربتك كويس

يوم هي تعبت قوي وروحنا المستشفى والدكتور دخَل 4 ساعات وخرج يقولي روحي وادعيلها أجهزة الجسم وقفت

روحت  ويوم الحد 28/4/2013  رحت الساعة 9 الصبح الدكتور قال لي ادعيلها بقى قاعدة جنبها نص سوا وماتت . أمي ماتت  الجهاز اللي بيعمل رسم القلب ده وقف آه واللهِ وقف  ندهت للدكتور وطالعني بره وقاعدة  اابص في المونيتور اللي قدام الممرضة لحد ماغطوا وشها . آه واللهِ أمي ماتت

أنا ماكنتش فاهمة حاجة بس لقيتني بمضي على شهادة وفاه وتصريح دفن وبكلم واحدة بتغسل الناس والناس بتعزيني وبدور على ماما علشان نعرف مين اللي مات مش لاقيها أول مرة اقف في حاجة زي دي لوحدي

مش طول عمرنا يا ماما بتقوليلي أنا  إنتي مالناش غير بعض كده سبتني أعمل الحاجة  دي لوحدي

ورحت العزاء وقريت اليافطة عزاء دكتورة  ابية بركات . آه واللهِ دي أمي ماتت بجد

روحت البيت  يوم اتنين تلاتة عشرة ماما مش موجودة مش عارفة أكلم حد . عاملة قدام الناس اني كويسة  ومفيش حاجة بس باكلمها وحنا قاعدين لوحدينا بس مابتردش عليَّ / رحت زرتها  وعارفة انها موجودة بس تحت التراب وعمرها ماهتطلع ترد عليَّ

وحشتيني يا أمي واحشني ضحكتك وواحشني كلامك وحشني لما كنتي بطبطبي عليَّ . لما كنتي بترني على موبيلي بالليل وانا نايمة علشان مش نصحي بابا ونأقعد ان وإنتي نتكلم ونتفرج على التلفيزيون .

لما كنتي بتكلميني وانا في الشغل تقوليلي اجبلك إيه واعملك إيه وبابا زعلك في إيه

لما كنتي بتكلميني في الشغل وبابا مسافر وتقوليلي أحط بنزين علشان افسحك

لما كنتي أيام الكلية تجبلي الكل معاكي وتديهلي أكله في العربية علشان نعرف نخرج بعدها بدل ماأنا مفرهادة كده

لما كنتي بتنزلي نشتري هدوم أنا وإنتي . وتقوليلي أنا باكره اللون البمبى

لما كنتي بتشوفيني بعيط وتقوليلي بنتي متعيطش بنتي كبيرة تفكر وتحل المشكلة متعيطش

لما كنتي تعبانة وقبل ماتموتي بـيومين مسكتي ايدي وتقوليلي خلي الناس فخورة بيكي ولما تشوفك تدعي ل أمك

وحشتيني ووحشني هزارك معايا ووحشني لما كنتي بتنكشي الناس كلها

وحشتيني بكل حاجة في الدنيا . البيت ملوش طعم منغيرك . مش عارفة أعمل حاجة ولا عارفة أبقى نورهان بتعة زمان . محدش بيضحك ومحدش بقى عوز يتكلم . أنا وخدى بالي من بابا  زي ماقلتيلي . بس نفسي اكلمك  نفسي اشوفك نفسي احكيلك حاجات كتير . مش عارفة أحس ان في حد زيك ومحدش مصدق ان أنا فعلا ماكانش ليَّ غيرك وعمر ماحد كان جنبي أنا وإنتي غير ربنا

وحشتيني . يارب القران والدعاء يكون بيوصلك

يارب تكوني في مكان أحسن . رمضان منغيرك مش حاسة بيه وعيد ميلادي جي أهو ونتي مش موجودة محدش هيعملي عيد ميلادي زيك ولا حد  هيكلمني الساعة 12 يقولي كل سنة وإنتي طيبة زيك

محدش في الدنيا زيك بجد أنا منغيرك ولا حاجة

ربنا يرحمك يا حبيبتي ويجعل مثواكي الجنة

إنتي عملتي خير كتير وعلمتي ناس كتير وأنا بدعيلك كتيير قوي بس بجد وحشتيني نفسي احكيلك حاجات كتير وفي ناس كتير كانت نفسها تشوفك وتعرفك وتشوف حنيتك . يشوفوا نصفي التاني اللي ماكانش ليَّ غيره . ربنا يرحمك يارب