رمضان كريم . حد شاف اعلان أحمد عز بتاع ماهي . بتع أنا عوز اتجوز .
يالاهوتي يالاهوتي احنا وصل بين الحل للمنظر ده . اعلان فكرته ببساطة أحمد عز ممثل ماشالله وسيم وعنده كاريزما وعمل يتكلم وفي الاخر أنا عوز اتجوز . الإختلاف دلوقتي مش في أحمد عز ولا في اللي عاجبهم الإعلان المشكلة في الفكرة بتاعت الإعلان اللي اصبحت متأصلة في المصريين وهي الجاذبية وطموح البنات انهم يتفرجوا على أحمد عز اللي عوز يتجوز .
لو تفكر صانعي الإعلان اننا بالسطحية دي وهو ده اللي هيخلينا نفكر إيه اللي أحمد عز عوزه . ولا التفكير اننا هنعد نفكر يمين وشمال الإعلان ده بتاع إيه ..
يعني دلوقتي هم فكرتين عندنا . أولا الفضول القااتل اللي عند المصرييين علشان نعرف الامور ده بيتكلم عن إيه . وثانيا التفكير بتع البنات إيه ده أحمد عز هيتجوز
طيب لو طبقنا ده في حياتنا العملية هنلاقي إيه . الفضول القاتل الحشرية التدخل . تبقى قاعد مركز في حاجة مثلا بتقرا كتاب أو جورنال وتلاقي حد لطيف جي يقولك إيه ده إنت بتقرا كتاب . ده إيه ده .... وإنت مالك يا عم الحاج هو الكتاب ده بتاع الست الوالدة . تبقى ماشي في الشارع ورايح مشوار وتلاقي تليفون جايلك إنت خارج ليه . إنت مش في البيت ليه . وهكذا . هي دي حياتنا الفضول التدخل مناخيرنا اللي مدخلينها في حياة التانيين
تلاقي صاحبتك الجميلة على الفاس بوك كتبت انها اتخطبت , قبل ماتدخلي تقوللها مبروك لازم تدخلي تشوفي الامور اللي خطبها ده شكله إيه وبيشتغل إيه وتفتكري يتعرفوا على بعد منين وصوره وصور اصحابه وياترى اصحابه دول متجوزين ولا سينجل . لو شكل اصحابه سينجل وحلوين ونضاف . فجأة الصداقة دي تبقى إيه بقى صاحبتي حبيبتي انتتمتي روحي قلبي عينيَّ . وتقربي منها وتصاحبها وتحبيها علشان تتعرفي بالعريس الجميل واصحابه . ونبدأ الاسئلة تعرفيه منين وساكن فين ومامة وباباه . ونتي ملكككككك تدخلي في اللي مالكيش فيه ليه .
زميلك في الشغل المدام بتكلمه وبيقولها اجبلك إيه وانا جي يا حبيبتي
تلاقي نفسك بتسأل ليه ترى بتقوله عوزة إيه . وهيروح يجبلاها إيه . ليه الفضول وليه الواحد يفكر في طلبت الغير . مالنا ومال أحوال الناس وظروف الناس . ماكل واحد أدرى بـظروفه وأدرى باللي محتاجه ونفسه فيه
وهل أي حد فينا بيحب ان حد يدخل في حياته ويعرف ظروفه . وهل الفضول ده مش ممكن يقلب بحقد أو يقلب بحسد أو تمني زوال النعمة من الغير , ممكن يحصل وحنا مش وخدين بالنا
يا بني البشر . حفظه على أبسط معني الإنسانية وهي الخصوصية . كل واحد بيحب يكون ليه خصوصيته ليه حياته ليه افكر في حياة غيري ليه افكر في طريقة افرض نفسي في حياة غيري واحسس اللي قدامي إنه مش براحته وإنه مش واخد حريته
سيبونا في حالنا وخليكم في حالكم . ربنا أعلم بالنوايا ويارب مناخيركم تبقى قصيرة
No comments:
Post a Comment